Eins og flest nágrannafjöllin er Nadelhorn með þrjá bergveggi og þrjá hryggi. Norðurhliðin er hulin Ried-jökli en suðvestur og austurhliðin eru úr bergi. Þrátt fyrir töluverða hæð er Nadelhorn frekar einangrað því það sést lítið úr þorpunum og þegar skyggni er gott þá felur það sig á bak við nágranna sína. Fjallið er hins vegar mjög vinsælt meðal fjallagarpa þar sem flestar klifurleiðir eru ekki sérstaklega erfiðar og fjallaskálarnir Mischabelhytta og Bordierhytta bjóða upp á mjög þægilega aðstöðu til að klífa þetta virkilega fallega og stórfenglega fjall. Nadelhorn og Lenzspitze mynda öxlina frá Mischabel að Nadel-hryggnum. Þar sem tindarnir tveir eru mjög nálægt hvor öðrum er hægt að klífa þá báða á fallegum degi. Að fara yfir Nadel-hrygginn er ein af frábærum gönguleiðum svæðisins. Nadelhornið er rammað inn af þremur stórum jöklum, Hobärg jöklinum, Hohbalm jöklinum og umfram allt hinum volduga Ried jökli sem rennur í átt að Grächen.

Nafnið er dregið af stórri rifu í berginu sem er um 10 m norðvestur af hæsta punktinum og myndar sporöskjulaga holu í fjallinu, Nadelloch, einskonar flöskuháls sem sést sérlega vel frá Festijoch.

Nadelhornið var einn fárra fjarka í Wallis sem var fyrst klifið af heimamönnum, þeim Franz Andenmatten, Baptiste Epiney, Aloys Supersaxo og J. Zimmermann hinn 16. september 1858. Þessi hópur fjallaleiðsögumanna og verkamanna hafði það verkefni að reisa þríhyrningapunkt á tindinum.